~:§:~
Op deze pagina vindt u de door Erik Verroken uitgevoerde woordelijke transcriptie van het testament van Jacop van der roke, zoals het werd geregistreerd in de scepenboek van Gedele van het ambtsjaar 1427-'28, bewaard in het Stadsarchief te Gent reeks 330, boek 19 f° 170 v°.
Up den 18en dach in juni int jaar ons heeren MCCCCXXVIII in tscependom her boudin de grutere her gillis maeyaert en haren gesellen so quam voor scepenen int gemene geselscap Jacop van der roke kende en verclaerde bij goedes versienich dat hij geordineert heeft en gemaect heeft sin testament en sin besten wille gelijc dat hij over gaf en dede besten ter kennisse van de scepenen waeraf de teneur hier naer volgt van woerde te woerde :
Ic Jacop van der roke gaende staende machtich mine redenen bi der gracien van gode hebbende ter mirewaert mine 5 sinnen peinsende merkend en wel versiende dat gheenen dinc zeker en es dan de doot en niet onzeker dan de wijle der doot en dat de creature niet en heeft dat ze verantwoorden mag haren Sceppere over hare verdienste begeeric te voorsiene en willen voersien daventuere der doot met testamentelikeren ordinanchien make, stichte en ordinere mijn test en utersten wille bij rade van goeden broeders en lieden van goede dat mijn god verleent heeft in de here ons here der almachtige gode der maghet sente marien en al de hemelse geselscepe in verlanessen van al mijne studen over mijne ziele en over alle der geene zielen dat ick begeerende ben in der manieren hiernaervolgend :
Int beginsel so offeric gode der almachtigen vader der maghet sente marien en alder hemelse geselscepen mijn siel en mijn lichame der kerkeliken sepulturen dewelke ic kies teckerghem up tkerkhof wille oec en begheeric als ic comen sal van live ter doot dat men gelde en betaele alle mine redeliken scult die ic sculdich sal sijn en dat men ghenouch doe alle den ghenen die hen met redeliken saken van mij beclaghe zullen van mijn gereetsten goede dat naer mij bliven sal alsoec mijn testamenteurs en executeurs goed sal dunken
Item begheeric gedaen te hebben up den dach dat men mij begraven sal van tameliken uutfaert ter ordinanchie van mijn testamenteurs hier ondergescreven naer dat sij weten dat mijne meeninghen es ende Ic hem lieden gelast hebben
Item begheeric gedaen te hebben up den dach van minen uutfaert al die wijle dat men mijnen uutfaert doen sal 30 zielsmessen over mijne ziele en over alle de gheenre zielen daer ic over begerende ben daertoe dat ic geve 05 sch gro
Item begheeric dat men deele den aermen omme goede up den dach van minen uutfaert der broet van eene mudde taerwen over mine ziele en over alle zielen daer ic over begeerende ben
Item begheeric dat de broederkens up de veste minen dooden lichame draghen sullen te grave welken broederkins ic geve over hare pine moeyte ende aerbeyt en dat sij eeuwich mine sielen bidden sullen 16 sch gro
Item gevic der kerken van heckergem in testamente 02 sch gro,
Item der kerken v Sente Michiels 02 sch gro,
Item den Heiligen Geest tsente Michiels 02 sch gro,
Item gevic in testamente her Lievin Stoep priester 05 sch gro,
Item her Jan exstyl priester insgelijcx in testamente 04 sch gro,
Item den uppercosterie Sente Michiels 04 gro,
Item den ondercosterie Sente Michiels 02 gro
Item Jac Oliviers minen petrin 16 sch gro ende begheeric dat men hem doen afslaan sal van meerdere somme die deselven Jacop Oliviers tachter en sculdich es daeraf dat 1 wettelike copie es vut scependom der kuere,
It ghevic theukine van den brouke geeraerd zone van den brouke minen petrin 02 sch gro,
Item Jan bonaert minen neve minen kerel gevoedert met musen,
Item heinric de visschere 06 sch gro,
Item gevic merkine sreynaeren mine metrin 06 sch gro,
Item gevic calle Symoen pijcx dochter miere nichte 06 sch gro,
Item Simoen kersteman 06sch gro,
Item ghevic den cnape die ter doot van mij met mij wonen sal 02 sch gro
Item den joncwive .. 12 gro,
Item copkine van der roke fs jans minen selver met zeghel die ter minen doot achter bliven sal ende in minen jeghenwordige testamente en utersten wille so kies ic de stelle te minen testamente mijne sonderlinghen lieve en wel betroude varende in gode claren spoerters minen lieven wijf en Janne van der roke minen lieve geminde neve daer ic oem af ben en bidden heurlieder naerstelic dat zijt wesen willen en hem der mede lasten in quitinghe van minen zielen en dat mijn testament in al sinen pointe doen vulcomen en vuldoen so sij alre eerste zullen comen en moghen naer dat ic van deze werelt versceeden sal wesen te minen goeds coste van de beste en gereetsten goede die naer mij blijven sal als scadelose testamenteurs den welc testament vorseiden ic updraghe en sette al tgoed dat naer mi bliven sal vutgest. omme daermede testament in al sine pointe te doen vulcomen en geven over al sine pine en moeyte te weten claren minen wive haer beste ghardel ofte de somme van 3 lb gro janne van der roke minen neve 1 selveren schale weghende 1 maerc de welke testament vorn ter neerenste bede ende verzouke van Jac van der roke en omme de versekerthede so bat ende versochte aermoederlike de vors Jacop de scepenen van gedeele als sie wet die ter doot van hem te kennene en te wijsene zullen hebben van sine goede die sij de ordinanchie inhoudende sin testament over utersten wille up hem en sin goed kennen willen ten welker naerster bede van Jacs vors scepenen ontfinghen de kennesse van sine testament Ende hebben in confirmacie de vastenesse doen stellen over Registratie in den bouc van haren scependom actum ut supra”
~