~:§:~
Op deze pagina vindt u de tekst van een chirograaf uit augustus 1225, gepubliceerd door A. d'Herbomez. Nicholes de le Roke was ,in zijn functie van schepen van Doornik, getuige bij het opstellen van deze acte.
Bron : Collection de Chroniques Belges inédites - Chartes de l'abbaye de Saint-Martin de Tournai.
Auteur : A. d’Herbomez
Origineel : Archives de l’État à Mons, fonds de Saint-Martin, carton 84
regest :
À Tournai, en août 1225, Henri li Clers a vendu une rente à l’église de Saint-Martin de Tournai.
tekst :
Ce sacent cil ki sunt et ki avenir sunt, et cest escrit veront ke Henri li Clers a vendi, et werpi, et clama cuite à le glise Saint Martin de Tornai, .XXXIII. s. et .IIII. deniers de Flamens de rente iretavle par an, as termes ki i sunt.
Et Willaumes Darsiele doit ceste rente as termes ki i sunt, de le maison de piere ki fu Watier des Molins, ki siet d’encosté le porte dedens les murs, si c’on va à le porte de Cortrai.
Et Henri li Clers eut encovent ceste rente à aquiter à l’asens des eskievins.
Et Henri li Clers en a donet en wages quan k’il a en ceste justice por le cuitance, plèges Evras Audent de l’acuiter.
Et Gilos Paskins ki de ceste rente estoit tenans et perdans, por ço k’il avoit por .XIIII. mars en wages, si mist en le wage et le tenance en le main l’abet, el tesmoign de cials ki adunt furent eskievin.
Ce sacent cil ki sunt et ki avenir sunt et cest escrit veront ke Jehans Froidecuisine dona par escange à le glise Saint Martin de Tornai .XXX. s. de torniziens de rente iretavle par an, as tiermes ki i sunt, sor une maison ki siet à le Vigne, dehors les murs.
Et li glise Saint Martin de Tornai si avoit en le porofe Saint Jakemes [vers] Maire .... s. et .VIII. d. de Torniziens et .....XIIII. capons de rente iretavle par an as tiermes ki i sunt.
Et li glise Saint Martin si devoit de ço rendre à le glise Nostre Dame .V. s. de Torniziens et .X. capons.
Et ceste rente, si con ele est ci nomée, a donet li glise Saint Martin par escange, par l’otroit de l’abet, ad Jehan Froidecuisine.
Et Jehans si doit le glise Saint Martin acuiter de ces .V. s. de Torneziens et de ces .X. capons, et li glise Saint Martin doit acuiter Jehan ceste rente si con ele est nomée, et Jehans le glise Saint Martin, el tesmoign de cials ki adunt furent eskievin.
Ce sacent cil ki sunt et avenir sunt et cest escrit veront, ke li glise Saint Martin de Tornai avoit .III. boniers de tiere vers Orke en le justice de Tornai ; et de ce devoit li glise Saint Martin de Tornai à le glise Nostre Dame .V. rasières de forment et .I. quarteruel l’un an, et ad l’autre .V. hotials, et .V. capons et demi par an.
Et ces .III. boniers de tiere, c’on apiele à le Haise, a li glise Saint Martin werpit et clamet cuite, par l’otroi de l’abet, à Sohier de Lameing, ki manans est à Orke, par teil ke Sohiers doit acuiter le glise Saint Martin de Tornai envers le glise Nostre Dame de le rente de formens [et de capons], si con dit est devant.
Et Sohiers si en a le justice de Tornai .II. boniers de tiere pau plus u pau mains ; et sor cele tiere si a Sohiers otriet à le glise Saint Martin .IIII. rasières de forment de rente iretavle par an, à paier à cascun Noel, et cascune rasière .IIII. den. Torneziens pieur ke le milleur.
El tiesmoign de cials ki furent eskievin, si con Gontiers d’Orke, Téris del Postic, Leurens li Merciers, Willaumes li Toiliers, Evrars Estampe, [Nichole]s de le Roke. Tot cist furent ...
Et por co ke ces devises furent faites ensanle, le jor Saint Piere, en un seul liu, en l’encostriel Saint Martin, se sunt eles mises en un seul escrit.
Et por ço k’eles demeurent fermes et estaveles, ne ke par alongement de tans ne s’esvanuissent, s’en fist li glise Saint Martin cartre faire, et livra en le main des eskievins dont vos avès les nons oïs.
En l’an de l’Incarnation .M.et .II. cens et .XXV., el mois d’aoust.
~:§:~
• klik hier om naar het begin van dit document te gaan